WILLEMSTAD: Dia 11 di mart último, e kaso sensashonal Babel a ser konkluí ku e veredikto kulpabel kontra èks Promé Minister di Kòrsou, Gerrit Schotte, i su pareha Cicely van der Dijs, kende a keda akusá, konforme e rekisitorio, di falsifikashon di resibu, labamentu di plaka, soborno atministrativo, i posishon di dos emisora di interferensia di frekuensia. Tambe hues a ordena Schotte pa debolbé na e ofisina di gobernador e pasaporte diplomátiko ku supuestamente ela pèrdè. Schotte a keda sentensia na respektivamente tres aña i no por forma parti di e sistema elektoral pa e próksimo sinku aña, i van der Dijs a haña djesocho luna, kual nuebe luna ta kondishonal.

Na pia di e trapinan di palasio di hustisia, abogado Eldon Sulvaran a ekspresá su desapunto den e veredikto i a primintí di apela esaki inmediatamente. Schotte di su partí a ekspresá su deskonfiansa den e huesnan di e korte di Kòrsou, partikularmente Irene Lips, i a papia di un persekushon polítiko di podernan neo-kolonial ku no kièr miré den polítika. Schotte no por kaba di komprondé e echo ku e i van der Dijs a aseptá varios pago di e dudoso Sr. Corallo i a falsifiká resibunan pa skonde esaki, ta un akto repudiabel kometé pa kualke siudadano, pero espesialmente pa un promé minister. Schotte ta asina deskonektá ku realidat ku e ta hustifiká su komportashon splikando ku tur e plaka a bai pa finansiá partido i kampaña polítiko. Tristu kon un èks promé minister ta para riba su saku di batata i grita ku e no ta ni e promé, ni e delaster ku a hasí esaki, pero ku definitivamente e ni van der Dijs a enrikesé su mes.

No a skapa nos e ironía den e echo ku Schotte primeramente lo mester somete su apelashon na e mes un Korte di Hustisia ku e tin tantu deskonfiansa den dje. Aki ela pidi pa su kaso ser tende pa por lo menos tres hues ku nunka a biba na Kòrsou i ku lo ta menos ‘kontaminá’ pa e polítika lokal. Si Schotte i van der Dijs ke apela e veredikto atrobe, mester detektá erornan prosedural legal promé ku nan kaso por bai kasashon na Korte Supremo di Hulanda. Akí Schotte i su tim legal enkabesá pa abogado Sulvaran, lo mester argumenta dilanti huesnan hulandes, ku muy probablemente tambe ta ser dirigí pa e mes un forsanan neo-kolonial misterioso ku e parlamentario ta atribuí pa su persekushon polítiko. Konosiendo Schotte su sentido di superioridat moral kuestionabel, e kaso akí por resulta te na e tribunal di Hustisia di Unión Europeo, e órgano hudisial máksimo, unda sí e ta spera di haña un huisio hustu.

E veredikto di Schotte i van der Dijs ya tin implikashonnan serio pa e klima polítiko i proseso elektoral, unda asta parlamento di Kòrsou a distansia su mes di e polítiko kontroversial. Mike Franco, presidente di parlamento, a urgí Schotte pa tene e honor na su mes i retira, un konsepto inimaginabel pa e lider polítiko di MFK, kende a primintí di agota tur via legal pa klara su nòmber i ta gosa di e sosten kompletu di su partido. E pregunta ta si tur e maniobra legal lo keda realisá promé ku elekshon dia 30 di sèptèmber próksimo.

Ekspertonan polítiko ta pronostiká un aña di elekshon tumultuoso, unda aproksimadamente 16 partido lo inskribí pa partisipá na elekshon. Mane ta bisa den boka di pueblo, ‘niun ta un’, i pa promé biaha nos ta enfrenta un elekshon unda niun partido no ta profilando hopi konvinsentemente i atrobe tin hopi segmentashon. Según enkuestanan elektoral preliminar, apesar di tur e komplikashonnan legal, Schotte te ainda ta gosa di un popularidat signifikante bou di e pueblo. E pregunta ta si e veredikto di korte keda para despues ku Schotte agota tur su apelashonnan, i e lider polítiko di MFK mester bai sera, kon esaki lo afektá su partido?

E sirko elektoral ya ta pinta di bira unu polémiko, unda un lider karismátiko pero kontroversial ta keda hala voto.

P’esei nos ke introdusí algun ponensia, ku nos ke boso pensamentu riba dje i lo publiká e resultadonan den nos siguiente artíkulo: click here.

.

Reakshona riba nos Facebook página!

Pa Redakshon di Progreso di Kòrsou, 28 di mart 2016.

Por hasi uso di e kontenido aki, basta esaki sosodé na un manera integral i ku menshon di e fuente: Progreso di Kòrsou

Krédito di potret: De Surinaamse Krant