TRANSPARENSIA DEN DISKUSHON RIBA REFINERIA TA HOPI NESESARIO

Tur hende ta deskonfiá di otro

E diskushon tokante refineria ta sigui lanta kabes di esnan ku ta pro i kontra seramentu. Di e forma aki tur dos kampo no ta basilá, pa den nan bentaha, duna informashon di nan propio posishon na un manera selektivo i òf pa brua .

E interesnan ta grandi tambe, pues motibu sufisiente pa tene e diskushon nashonal aki públiko, basá riba transparensia máksimo i basá riba echo. Pa nos Parlamentu tin un ròl krusial den esaki komo protektor di interes general di pueblo. Segun nos tin hopi pregunta kritiko ku por puntra (ku mester a hasi kaba) den e situashon aktual. Lamentablemente ta parse ku Parlamentu na un manera mansu ta sigui gobièrnu den e trayekto kompleho manera esaki. Un trayekto kaminda nos ta reakshoná manera ta un maribomba a pika nos ora ta mustra manera tin peliger ku e personal di Isla ta pèrdè trabou, pero no ta duna oido na e dudanan ku ta sigui krese i e inseguridat serka sobrá di komunidat.

Awor ku Tweede Kamer ku énfasis ta mete ku e tema aki nos ta kere ku a yega tempu pa nos stipulá algun punto kritiko i yuda alimentá Parlamentarionan (aki i na Ulanda) ku preguntanan ku segun masha tempu mester a hasi.

E siman ku pasa nos Promé Minister Ben Whiteman tabata hopi okupá ku e tópiko aki. Tabatin reunionnan urgente di Konseho di Minister (RvM), konferensha di prensa ad hoc, palabranan insultante den direkshon di prensa ku segun e ta impuru formulá, i atakenan konfundí riba tur loke ta den kaminda ku por menasá modernisashon di e rafinaderia. Manera e aparente midimentu èkstra di aire ku Ministerio di Defensa ke hasi grátis pa nos tur (prinsipalmente pa su personal) den Julianadorp. Tokante e midimentu aki ya tabatin e korespondensianan nesesario, pero apesar di  esaki ta hasi manera e ta un sorpresa i a sugerí ku Defensa a hasi un eror.

Nos ta strukturá asin’aki tambe nos pensamentunan konforme e ekspreshonnan di Primié e siman ku  a kaba den korantnan i despues den un entrevista na radio Paradise FM ku por skucha via Paradise FM.

Na promé lugá e orígen di e krítika riba e direkshon aktual. Tin dos inkumbiniensia, di diferente grupo di siudadano, i no ta  duna atenshon na ningun di dos òf ta eliminá esakinan, pues e inkietut ta keda.

  1. Polushon di aire no ta akseptabel, i warda 4 aña ta tambe inaseptabel. Komo kontesta riba e pregunta si miéntras tantu por hasi algu kontra e polushon, Primié ta bisa “Nos ta sigui midi”.
  2. Por konkluí ku modernisashon di refineria ta e úniko paso prudente i sosial ekonómiko mas bentahoso pa nos pais? Hopi ta duda esaki. Organisashonnan manera GreenTown ta pinta un futuro ku tambe ta mustra atraktivo, i gobièrnu no ta splika dikon e no ta sigui investigá e posibilidat aki – maske ta pa un plan B.

E úniko desishon gubernamental ku (ku asina leu ta konosí) tin di e materia aki ta data 2013 kaminda a instalá un tim multidisiplinario (MDPT), ku a haña dos enkargo:

  1. Analisá e posibilidatnan pa modernisashon I
  2. buska senarionan alternativa pa e tereno. E último aki  apénas a tuma lugá.

Pues loke si mester hasi ta kolekshoná tur komunikado, pasombra MDPT i Minister Presidente aparentemente no ta haña nesesario pa duna pueblo informashon den e aktividatnan (i gastunan), kòrda duna kuenta i rason.

Den AMIGOE di 4 di febrüari por mira Primié riba promé página ku e titulo: “no ta prolongá e kontrakt outomátikamente, pero Isla di tur manera ta keda habrí”. Aki tambe por kologá un ‘label’ di notisianan tendensioso. Minister Presidente no ta pasa su outoridat ku esaki? Aki nos rasonamentu:

  1. Pa un menshon pisá manera esaki di tur manera mester ta basá riba un desishon di gobièrnu, kargá pa henter Konseho di Minister (anke e ta kargá pa un mayoria di miembro, pero tur minister mester por duna nan opinion i haña oportunidat pa partisipá na deliberashonnan).
  2. A tuma tal desishon gubernamental? I, si ta asina, riba kua fecha a tuma e desishon aki? I ki dia a publiká e desishon i via kua media a partisipá esaki?
  3. A entregá e desishon gubernamental aki na Parlamento pa aprobashon?
  4. E MDPT ku a instalá basá riba e Desishon Gubernamental, ta un komishon ku ta konsehá gobièrnu, sin ningun outoridat pa tuma desishon outónomo. Pió ainda: dor ku MDPT no tin un personalidat hurídiko, e no por partisipá na transakshonnan legal. Pues MDPT no por tuma “desishon”, ku Isla “di tur manera” por keda habrí despues di 2019. Gustosamente aklarashon di parti di gobièrnu, spesialmente Primié, kaminda e ta basa su informashon ku firmesa i fuera di konteksto na prensa.

Ademas nos ke hasi algun pregunta tokante algun ekspreshon ku Minister Presidente a hasi den e entrevista ku Paradise FM. (Atenshon e ta ripití loke MDPT masha tempu a bisa). Nos ta parafrasiá:

Whiteman: Denter di poko ta bini un destaho públiko pa traha un planta LNG, ora traha esaki ta redusí kontaminashon ku 80%. 16 partido a reakshoná kaba riba nos intenshon pa publiká e destaho aki.

PdK: Den un informashon previo a bisa ku konstruí un planta LNG ta kosta 600 mion florin. Ken ta paga esaki? Serka un proyekto grandi asina ta lógiko ku diferente partido ke partisipá na ehekushon di algun partinan di e proyekto. Pero kuantu di nan ta dispuesto pa imbertí 600 mion florin den Kòrsou. I kiko nos tin ku duna bèk a kambio? Kon e invershonista ta logra saka su invershon bèk? Ora e konstrukshon ta kla, kiko Kòrsou tin na esaki, banda di ménos polushon di aire?

.

Whiteman: Konstrukshon di e planta LNG ta resultá den un ‘eksploshon di kupo di trabou’.

PdK: Kon ta pará ku e regulashonnan di seguridat rondó di un planta LNG? Tin peliger di eksploshon pa kasnan riba algun kilometer di distansha? I e kuponan di trabou: kuantu presis? Riba kua nivel di enseñansa? Pa kuantu aña? I kuantu lo ta trahadónan lokal? I den kaso ku skohe senarionan alternativo (manera desmantelashon di refineria) no ta krea un ‘eksploshon’ di kupo di trabou pa hopi aña?

.

Paradise FM: Kiko ta bo plan pa den e periodo entre aworakí i ora e planta LNG habri pa redusí polushon di aire?

Whiteman: Nos ta bai hasi loke nos ta hasiendo for di 2009 huntu ku GGD Amsterdam: Nos ta sigui midi.

PdK: Esaki naturalmente no ta un kontesta. Kon por bende esaki ku e hendenan ku ta biba bou di huma? Dikon no ta papia di kima kombustibel limpi manera gasoil? Tokante pone un aparato pa midi na tur chimenea? Di remplasá e filternan di aire defekto den chimenea?  Etc.

.

Paradise FM: Na 2012 ta e rapòrt Ecorys rapport a konsehá e maneho di dos alternativa. Despues a bini e desishon gubernamental kaminda a formalisá e proposishon aki ku instalashon den forma di e MDPT.

Whiteman: For di e tempu ei diferente eksperto a kritiká e rapòrt di Ecorys pues nos ta sigui ku un maneho so, esta modernisashon di e refineria.

PdK: Ken a tuma desishon formal pa revoká un parti di e desishon di e Desishon Gubernamental di 2013 (number 13/2899)? Unda esaki ta stipulá, aklará òf publiká? Konseho di Minister i Staten tin un posishon den esaki? Si ta si for di ki dia?

Segun nos stratégikamente e eskoho aki ta unu peligroso: nos ta bira dependiente di un partido so, esta unu ku ta dispuesto pa finansiá e modernisashon kompletu ($3 miar) (a kambio di kiko?). Sin plan B bo ta pará suak den e negosiashon. I si plan A faya, ta konfrontá nos “netamente” ku un senario grave loke sigur nos ke evitá aworakí: sera refineria sin sufisiente tempu pa formulá i ehekutá un plan di transishon pa hende ku aworakí ta dependé solamente di entrada di refineria.

.

Whiteman: riba e impakto ekonómiko di refineria: tin 4000 famia ta dependé di refineria, direkto i indirekto.

PdK: Oké, esei ta hopi mas ku 1049 persona (segun Ministerio di Desaroyo Ekonómiko (MEO)) tin riba payroll di Refineria Isla. Sobrá ta supkontratistanan. Kon a yega na e konteo ei? E análisis ei ta disponibel pa evaluashon kritiko? Kuantu kontratista ta 100% dependiente di Isla i kuantu pa un parti mínimo di nan entrada? Unda a hala e liña pa konta un persona den e kantidat di 4000 menshoná.

PdK: Un poko mas di un otro aspekto importante di e impakto ekonómiko: Divisa. Segun sifra di CBCS i MEO e refineria ta bon pa un ‘Refining Fee’ di mas o ménos 700 mion florin. Kon a definí e ‘fee’ aki? Te ku 2012 esaki tabata konforme e gastunan di Isla (mas o ménos 450 mion) na salario, suministradónan etc. Despues e ‘fee’ direpente a subi masha hopi mes pero konsumo lokal no.

PdK: Pa tur senario ta konta tambe e pregunta kon ta pará ku polushon di tereno i awa i fondo di laman. Ken ta bai karga e responsabilidat di e gastunan di sanashon i kontaminashon di Shell i Isla durante e último 100 aña?

O sea, tin hopi pregunta mará na e situashon di e problemátika di Isla. I esaki ta reforsá e nesesidat pa un debate públiko. Den media, i den Staten.

Miembro di Staten Alex Rosaria a bisa basta tempu pasá: “Demokrasia no tin nada na un misterio kontinuo rondó di e materia aki. Ademas di e forma aki, dor di tene echonan skondí, bo no ta haña aseptashon pa kualke un desishon ku gobièrnu tuma riba esaki.”

Un biaha mas, por ta masha bon ku e oponentenan di maneho di e gobièrnu aktual ta robes. I ku e Primié for di su posishon ta mira kos ku pa nos komunidat ta insufisiente konosí, i ku e ta kere ku e tin sufisiente rason bálido pa sigui su direkshon.

Pero realisá si ku falta di transparensha i komunikashon ta demostrá ku MDPT ta brua kos,  tin por lo ménos un indikashon di konflikto di interes i ta deskuidá kompletamente interes general. ‘If nothing else’ – ta tacha konfiansa den nos órganonan di estado di derechi. Parlamentu, usa esaki i kumpli ku bo ròl.

Diskutí ku nos riba nos via nos Facebook página!

Pa Redakshon di Progreso di Kòrsou, 8 di febrüari 2016.

Por hasi uso di e kontenido aki, basta esaki sosodé na un manera integral i ku menshon di e fuente: Progreso di Kòrsou

Isla aerial view-Bea Moedt

(c) Photo: Bea Moedt

Esaki ta un tradukshon di nos artikel anterior di dia 8 di febrüari 2016

.

Leave a Reply